​​

༄༅། །སྦེལ་ཀོབ་སཾ་བྷོ་ཊ་བོད་མིའི་སློབ་གྲྭའི་དྲྭ་རྒྱར་ཕེབས་པར་དགའ་བསུ་ཞུ། སློབ་གྲྭ་འདིའི་འཛིན་སྐྱོང་ལྡི་ལི་དབུས་བོད་སློབ་འཛིན་ཚོགས་ནས་རང་གཞུང་ཤེས་རིག་ལས་ཁུངས་ཀྱི་ཁྱབ་ཁོངས་སཾ་བྷོ་ཊ་བོད་མིའི་སློབ་གྲྭའི་ཚོགས་པ་ནས་བླངས་ཏེ་རྒྱ་གར་གཞུང་མང་གི་རོགས་མགོན་འོག་བོད་མིས་བོད་མིའི་ཤེས་ཡོན་ལ་བདག་སྐྱོང་བྱེད་བཞིན་པ་ཡིན། དེང་གི་སྐབས་འདིར་ཤེས་ཡོན་ནི་མེད་དུ་མི་རུང་བའི་ཆ་རྐྱེན་ཞིག་ཡིན་པ་དང། བོད་མི་ཞིག་ཡིན་ཕྱིན་སྲོལ་རྒྱུན་དང་དེང་རབས་ཀྱི་ཤེས་ཡོན་ཡ་མ་བྲལ་བའི་སྟེང་ཡ་རབས་བཟང་སྤྱོད་དང་ལྡན་པ་ཞིག་ཀྱང་དགོས་པས། སློབ་གྲྭ་འདིའི་མིག་འབེན་གཙོ་བོར་གཟུང་བར་བྱ་ཡུལ་དང་འབད་འབུང་ཆེ་སྐྱེད་ཞུས་དང་ཞུ་དགོས་པའི་ལས་འགན་ལྕི་མོ་ཞིག་དང་ལེན་བྱེད་བཞིན་ཡོད།

 

༸སྤྱི་ནོར་༸གོང་ས་བཅུ་བཞི་པ་ཆེན་པོ་མཆོག་གིས་ཕྱི་ལོ་༡༩༦༠ ཟླ་༣ ཚེས་༣ ཉིན་མ་སུ་རིར་བོད་ཕྲུག་སློབ་གྲྭ་དང་པོ་དབུ་འཛུགས་བསྐྱངས་པའི་ཐོག་བསྩལ་བའི་བཀའ་སློབ་ནང་། ང་ཚོའི་མི་རབས་སྔ་མ་ཚོ་ལ་འཛམ་གླིང་གི་འགྱུར་འགྲོས་དང་བསྟུན་ནས་གོམ་པ་སྤོ་མ་ཐུབ་པ་དང་ཤེས་ཡོན་གྱིས་མ་འདང་བས་བོད་ས་བྲལ་དགོས་པའི་དཀའ་ངལ་འཕྲད་པ་དང་། ང་ཚོས་བོད་ལུང་པ་རྒྱ་མིའི་ལག་ནས་རྩིས་བླངས་ཏེ་མང་གཙོའི་ལམ་སྲོལ་ལྡན་པའི་བོད་རྒྱལ་ཁབ་འཛིན་སྐྱོང་ལེགས་པར་ཐུབ་པ་ཞིག་བྱེད་དགོས། དེ་ཡོང་བ་ལ་རྒྱ་ཆེའི་བོད་མི་མང་ཚོགས་ལ་དེང་དུས་ཀྱི་ཤེས་ཡོན་ཚད་ལོངས་པ་ཞིག་མེད་ཐབས་མེད་པ་དང་། དགེ་སློབ་ལས་བྱེད་དང་བཅས་པས་ང་ཚོའི་རྩ་དོན་དམིགས་ཡུལ་དེ་སེམས་ལ་བཞག་སྟེ། སློབ་སྦྱོང་བྱེད་སྒོ་འདིའི་ཐོག་གྲུབ་འབྲས་བཟང་པོ་ཐོན་པ་ཞིག་ངེས་པར་དུ་བྱེད་དགོས་པ་སོགས་ཀྱི་བཀའ་ནན་ལམ་སྟོན་ལྟར། སློབ་གྲྭ་འདིའི་ནང་སློབ་ཕྲུག་ཕོ་མོ་སུ་ཡིན་རུང་ཚང་མས་ཚང་མ་ཤེས་དགོས་ཞེས་པའི་ཐ་ཚིག་གིས་ཟིན་ཏེ་འབད་རྩོལ་ཞུ་མུས་དང་། དེ་ཡང་དེང་སྲོལ་གྱི་ཤེས་ཡོན་སྤྱི་དང་ཡ་རབས་བཟང་སྤྱོད་གཙོ་བོར་བཟུང་སྟེ་གཏམ་བཤད་དང་རྩེད་རིགས་དང་རང་གི་ལེགས་བྱང་དུ་ཡོད་པའི་ཟློས་གར་འཁྲབ་སྟོན་སོགས་ཀྱི་ཤེས་བྱ་སྣེ་མང་ལ་དཀའ་ངལ་དང་ལེན་ཞུ་བཞིན་པས་འབྱུང་འགྱུར་གྱི་བོད་མི་རྣམས་ཀྱང་༸རྒྱལ་བའི་བཀའ་དགོངས་སྒྲུབ་མཁན་གྱི་བོད་མི་ཚད་ལྡན་ཤ་སྟག་ཅིག་ཡོང་རྒྱུའི་ཉིན་མཚན་དུས་དྲུག་ཏུ་རྩོལ་བ་དང་རེ་བ་ཚད་མཐོ་འཆང་བཞིན་ནོ།།